't Is zoaterdagoa'md, 't twijde perron
Zien wichtje dij staait al te wacht'n
't Is boet'n routkold mor van binn' is ze waarm
Ze stond der al ee'm over acht'n
Tuss'n Hoar'n en Helpman zigt e zukzulf
In 't roam van dij ol intercity
Wat spij op zien lok en hai denkt aan heur woord'n
Ik raais in gedacht'n voak mit die
Om twinteg veur nee'ng ja den komt der 'n train
'n Luudspreker belkt wat bericht'n
Ze loop'm 't perron of, de nacht is nog jong
En overal bliede gezicht'n
De zundag vlugt om en 't is zo weer oa'md
Ze stoan op 't perron met zien baaid'n
Ze kropt tee'ng hom aan en hai holdt zuk zo stoer
Ze schraait deur 't idee van de schaaid'n
Tuss'n Helpman en Hoar'n zigt e zukzulf
In 't roam van dij ol intercity
Wat spij op zien lok en hai denkt aan heur woord'n
Ik raais in gedacht'n voak mit die
Om tien over nee'ng ja den gaait der 'n train
'n Luudspreker belkt wat bericht'n
Ze lopt 't perron of en rilt van de kol
En overal zwaarde gezicht'n
Ze binn' al laang traauwd en ze binn' alweer schaaid'n
En baaid'n he'm heur ai'ng gedacht'n
En zoaterdagsoa'ms op 't twijde perron
Doar stoan alweer aander'n te wacht'n
Ik bin op miezulf en ik mout mie mor redd'n
Mor 'k ken der nog nait zo best tee'ng
't Is zoaterdagoa'md en ik loop noar 't station
De klok het 't twinteg veur nee'ng
Om twinteg veur nee'ng ja den komt der 'n train
'n Luudspreker belkt wat bericht'n
Ik loop 't perron of en ril van de kol
En overal zwaarde gezicht'n
En overal zwaarde gezicht'n